យល់ដឹងពីគ្រឿងញៀន អានអត្ថបទខាងក្រោមនេះ។ អត្ថបទនេះសាម័ញ្ញ ប៉ុន្តែខ្ញុំរំពឹងថា វាអាចអាចផ្តល់ជា គំនិតដល់អ្នកដែលមិនសូវយល់ដឹងពីគ្រឿងញៀនបាន។
គ្រឿងញៀនជាអ្វី?
(បទពាក្យប្រាំពី)
អ្វីទៅគេហៅថាគ្រឿងញៀន ឮ
ដែលមានលក់ដូរដោយលួចលាក់
មនុស្សជាច្រើនជាប់ជំពាក់
លបទិញលួចលាក់យកប្រើប្រាស់។
គ្រឿងញៀនគឺជាគីមីផ្សំ
ដែលគេលាយឡំធាតុផ្តេសផ្តាស់
មានសមត្ថិភាពអាចប្តូរផ្លាស់
ជាច្រើនផ្នែកណាស់នៃរាងកាយ។
វាមានឥទ្ធិពលដល់ប្រាសាទ
ឲ្យយើងលែងឆ្លាតលែងគិតឆ្ងាយ
យូរទៅរូបយើងនឹងប្រែក្លាយ
ធ្លាក់កាយក្លាយរោគសញ្ញាញៀន។
អង្គការសហប្រជាជាតិ
បានកំណត់ទៀតថាវាមាន
ដំណើរស្រវឹងកើតពុលឃ្លាន
ពោលគឺឲ្យញៀនពិបាកផ្តាច់។
គ្រឿងញៀនដែលគេលួចចរា
គឺមានយ៉ាម៉ាសូនគ្រាប់ស្រេច
ហេរ៉ូអ៊ីនញៀនមិនងាយផ្តាច់
ក៏គេសូនស្រេចលក់មួយៗ។
ចំណែកថ្នាំឈ្មោះអ៊ីចស្តាស៊ី
ឲ្យក្បាលគ្រវីដូចបង្កួយ
ច្រើនលក់ក្នុងបាជាជំនួយ
ឲ្យអ្នកណាមួយអាចរាំបាន។
រីឯកាវវិញសំបូរដែរ
ក្មេងអាវ៉ាសែទាំងប៉ុន្មាន
តែងយកជាមួយជាប់នឹងប្រាណ
ពេលញៀនរុករានគេយកហិត។
មួយទៀតកញ្ឆាអាហារផ្សែង
គេតែងជក់វាឥតអាណិត
ក៏ព្រោះតែពុំបានដឹងពឹត
ថាវាទាញយឹតទៅគ្រោះភ័យ។
ចំណែកបារីនិងសុរា
ដែលគេគិតថាពុំសូវអី
តែក៏នាំគ្រោះកើតទុកភ័យ
ឲ្យយើងប្រុសស្រីខូចសុខភាព។
បើដឹងគ្រោះថា្នក់ម្តេចក៏មនុស្ស
ចចេសរឹងរួសធ្វើថោកទាប
ប្រើថ្នាំទាល់តែចូលជ្រួតជ្រាប
ពីមុនសុភាពឥឡូវកោង។
មូលហេតុក៏ព្រោះតែចង់សាក
បារីបឺតខាកខ្អកគ្រប់យ៉ាង
តែស៊ូទ្រាំជក់ទាំងក្មេងក្មាង
ពេលញៀនកើតកាងកើតកាប់ចាក់។
ឥឡូវបានដឹងពីគ្រឿងញៀន
ដូច្នេះកុំឃ្លានកុំប្រឡាក់
នាំតែធ្លាក់ខ្លួនរងគ្រោះថ្នាក់
ជួនកើតច្រវ៉ាក់គុកពាក់ក៕
(សរសេរដោយមាសរ័ត្ន)
«ពាក្យមួយម៉ាត់សូមផ្តាំថា សូមកុំព្យាយាមសាកគ្រឿងញៀនសូម្បីតែម្តង!»
គេហទំព័រកំណាព្យខ្មែរ 